Rev 20 | ASO | STEP | Naza gohi ma ninguvoni' nene Okulumokuti' angelo' mali'mo seni nala' nabasi ido' hemuvosi nomine' galese'mi kii've nesi nene anau' do mino lemo navo ninguve.

Revelation of John 20

Satani Nene Kilisimasi Vanu Tauseni (1000) Minelive Lo Hemuvosi Nomine' Galeseu' Nene Angelo' Mali'mo Nohulo-divo Ningingumu' Zohane' Gizine' Gamazi

1 Naza gohi ma ninguvoni' nene Okulumokuti' angelo' mali'mo seni nala' nabasi ido' hemuvosi nomine' galese'mi kii've nesi nene anau' do mino lemo navo ninguve. 2 Lemo ogo a'mine sata' naba gele vine' loposo nite' ado' gomukuti' minine' gosihe' ado' Ve Goloso Satani nene analo' dokoo kilisimasi vanu tauseni (1000) minelive lo seni nala' naba nene ize-do 3 hemuvosi nomine' galeseu' nene do hulo-do a'mine galese'mi velelo' akahe nene lokimi ogosa si'zikelizave lo kekeize luhuvo a'mine akahelo' nene ma do gi'mizekine' ve. Ido' ne'mine ine' nene evene' zuho ato ato' ngele'mize gopo oga' ine' ma nene a'mine kilisimasi vanu tauseni (1000) minelingu' nene gohi ne'mine amilive losa lokimi o-dine' ve. A'mine kilisimasi vanu tauseni (1000) nene ogo vo osu' lavosa O'moso'mo gelavo gohi gamene li'nibemukovo' ma kuluhizi-dikevo omo heta ilido' o neive.

4 Ido' gohi ma ninguvoni' nene mo'mosi' ma minika' minika' ado' evene' ma nizavo ninguvoni' nene ingine evene' gamazi'ine mineline' gili di lisihe' i-ngidi gizebo i-ngidi minilizani' amuzo nene O'moso'mo ngemavo di minave minani' ve. Ido' ma ninguvoni' nene Izesu' gamazi've hizi ele' igi O'moso'mi gamazi li soto' iga' angumu' luvo'ine giti huli huli' ave ado' loposo niteto' nehe a'mine'mi avazaha'velo' nehe gelekele' igi gubi' izi imi opo'ni lami a'mine loposo niteli'mi maki've golihi'nido' nehe a'nido' nehe nesi nene mo damaveti vo'inehaza nene ninguve. Ingine nene gohi upuho' igi oti ve'ine gizi kilisimasi vanu tauseni (1000) ne'mi lulou' nene Kilisito' nesi maka' eze evene'velo' gizebo igi minani' ve. 5 Neve nene hilavete otiliza gamene naba vanu ne neive. Ne neiha a'mine gamenelo' nene hilave linge nene otami a'mine kilisimasi vanu tauseni (1000) osu' lavosa nene gohi ve'ine gizi otani' ve. 6 Ido' a'mine hilave otiliza gamene naba vanulo' gohi ve'ine gizi otilizave nene O'moso'mi evenele gihile gehepeve mini ngolize izilizani' akalo' mini mili minilisave. Ingine nene ado' gamene nabala mono' gilamave gohi hililizani' gameneu' nene a'mine gohi helaa' ne'mo do goloso o-ngedeline' amuzo've nene ma nomivo mo gohi hilami O'mososi Kilisito'nisi inite' lehizi-ngidaa' gono nene di mini kilisimasi vanu tauseni (1000) ne'mi lulou' nene eikisi maka' evene'velo' gizebo igi minilisave.

Ve Goloso Satani Nene Mudise Oloku' Nihuli-davo Ningingumu' Zohane' Gizine' Gamazi

7 Ne'mino kilisimasi vanu tauseni nene ogo vo osu' nolivo ve goloso Satani nene nalatoti' kuluhizi-dikevo 8 leme heta ogo vo misubou' misubou' evene' zuho ato ato' ado' nGogu ve Mangongu ve lani' aleve nene go'ine izo ngele'mize gopo oloseive. Ido' ngele'mize gopo ogo lovo di soto' igi hizilizangumu' nene do nubo o-ngedeleseive. A'mine di nubo ilizaa eveneliti naba'ine nene guvo noso gahevela gepe minine' ne'mini gatamolonido' mini vai' goloso minilisave. 9 Ingine a'mine misubo'mi gelengu' nene mine hutile' igi mini O'moso'mo lulo eme minine' numuno ebe' ado' eze evenele ingi monaa' ani' numuno ebe'ine Zelusalemi nene di vodo vodo i-di minani' ve. Ne'mine ani'za olo' ne'mo Okulumokuti' lemo do mikile' o-ngidine' ve. 10 Ne'mine ogavo a'mine aleve ngele'mize gopo ive ve goloso Satani nene a'mine salfa gehenilo' olo' lo mino noso ohuno ne'mino molo miningu' ado' loposo nitekisi soza polohete'vesi di huli-ngidikevo minasine' ebeku' nene di huli-dani' ve. Ne'mine ani'za a'mine ingine seto hamo nene gamene gamene go' liliha liti'muso izeliha mulumo gono nene ha gihivi' gihivi' igi minilisave.

Gamene Nabalo' Zasi Nabali'mo Evene' Vai' Ize' Nomolo-ngidivo Ningingumu' Zohane' Gizine' Gamazi

11 Ido' gohi ma ninguvoni' nene mo'mosi' mokono' nabasi ido' a'mingu' minivesi nene ninguve. Misubogi Okulumoki nene ingine minilisine' ebekisi nomivo a'mine ninguve ne'mi veleloti' nene mo mudise vi haha asine' ve. 12 Ne'mine ikesivo ninguvoni' nene hilave ngomo' naba' muki' nete nene a'mine O'moso'mi mo'mosi've'mi velela nene oti nizavo a'mine aleveti monovo'ine gizani' buku nene ma di patelani' ve. Ido' buku gohi ma ado' minevo' minevo' ngemeni dameni dalizaveti gulive'ine gizikani' buku nesi nene di patelani' ve. Ne'mine ikevo a'mine hilavete igi mili ika' ika' ani' initekumu' a'mine bukuu' gizikado' nene do molo ize' molo-ngedo a'mido' golo hizo meni ngemeka' ngemeka' ine' ve. 13 Ee, guvo nosou' hilave nene guvo noso'mo do soto' noo-ngidivo ido' helaa' monovo ne'mosi ido' hilaveti numuno ebe' nesi ingine hilave engi' a'ningu' minave nene di soto' nii-ngidasivo a'mine hilave hamo hamo' ingine igi mili ika' ika' ado' ado' nene do molosa ize' molo-ngedo a'mido' golo hizo meni ngemeka' ngemeka' ine' ve. 14 Ne'mine ogosa a'mine helaa' monovo nesi ido' hilavete minaa' ani' numuno ebe' nesi nene salfa gehenilo' olo' lo mino noso ohuno ne'mino molo miningu' nene do hulo-ngidine' ve. A'mine salfa gehenilo' olo' lo mino noso ohuno ne'mino molo minine' neve nene helaa' naba tuu ma ne neive. 15 Ido' ve maliti gulive'ine a'mine minevo' minevo' ngemeni dameni dalizaveti gulive'ine neine' bukuu' nene ma minamivo ningamive nene a'mine salfa gehenilo' olo' lo mino noso ohuno ne'mino molo miningu' nene di huli-ngidani' ve.